ICAN Taci Alwashin Warware Matsalolin Kasuwanci A Kano - In Ji Sabon Shugabanta

X Facebook Telegram WhatsApp

Kungiyar kwarararun Akantoci ta kasa reshen jahar kano ta yi alwashin ba da gagarumar gudummawa wajen magance matsalolin harkokin kasuwanci.

Alfijir labarai ta ruwaito sabon shugaban kungiyar Alh. Sa’idu Isa Bala wanda aka zaba a karo na 43 ne bayyana haka a lokacin rantsar da sababbin shugabanin kungiyar a birnin kano.

Ya ce kungiyar ta lura rashin shigar da kwararrun Akantoci harkokin ‘yan kasuwa da masana’antu da kamfanoni yana haifar da nakasu matuka a harkokin kasuwanci.

Bala wanda ya bayyana kwararrun Akantoci a matsayin maganin matsalolin harkokin kasuwanci da masana’antu, ya ce sabon shugabancinsu zai mayar da hankali wajen fadakar da ‘yan kasuwa muhimmancin aiki da kwararrun masana kididdigar kudi domin samun nasara a al’amuransu.

A yayin da yake gabatar da mukala Farfesa Kabiru Isa Dandago wanda kwarararen Malami ne a fannin, a jamiar Bayero ya bukaci kungiyar ta yi aiki da kwarewa wajen bunkasa tattalin arzikin jahar kano da harkokin kasuwanci dana masana’antu.

Wakilin Shugaban kungiyar na kasa Alh. Nasiru da shugaban kungiyar ta ICAN reshen jahar kano mai barin gado Alh. Habibu Ayuba da shugaban taron Ambasada Shu’aibu Ahmad da kuma Alh. Shehu Mohd Dankadai wadanda suka yaba da nagarta da kwarewar shugannin da aka zaba sun ja hankalinsu akan su kare martabar aikin Akanta musamman wajen rikon amana da gaskiya da kuma kare sirri a aiyukansu domin cigaban jahar, sannan sun yi fatan za su cigaba daga inda shubannin da suka gada suka tsaya.