Mahukuntan Gidan Talabijin na Abubakar Rimi (ARTV) sun yi watsi da wani rahoto da ya yi zargin cewa an sare bishiyoyi masu yawa tare da gudanar da harkar sayar da itatuwa a harabar gidan talabijin mallakin gwamnatin jihar, inda suka bayyana rahoton a matsayin mai cike da rudani da rashin sahihanci.
Da take mayar da martani ga rahoton da The Historica Nigeria ta wallafa, mahukuntan ARTV sun ce rahoton ya nuna rashin daidaito da kuma rashin bin ka’idojin aikin jarida, domin ba a nemi jin ta bakin hukumomin tashar ba kafin a wallafa shi.
A cewar mahukuntan tashar, ba a tuntubi ofishin Babbar Daraktar ARTV, Hajiya Hauwa Isa Ibrahim, ko wani jami’i mai alhakin bayar da bayanai a tashar domin tabbatar da sahihancin zarge-zargen da ke cikin rahoton ba.
“An wallafa rahoton ba tare da tuntubar mahukuntan ARTV ko wani jami’in da ya dace ba. Ka’idojin aikin jarida sun tanadi bai wa kowane bangare damar bayyana matsayinsa, musamman idan ana magana kan manyan zarge-zarge,” in ji sanarwar.
ARTV ta kuma kalubalanci ikirarin cewa ana gudanar da gagarumin aikin sare bishiyoyi a harabar tashar, tana mai cewa bishiyoyi biyu zuwa uku kacal aka cire.
Mahukuntan tashar sun bayyana cewa sabanin yadda rahoton ya bayar da hoto na lalata muhalli a babban mataki, adadin bishiyoyin da aka sare bai wuce biyu ko uku ba.
A cewarsu, an cire bishiyoyin ne daga wasu wurare na musamman bayan binciken tsaro ya nuna cewa sun zama mafakar bata-gari da masu aikata miyagun laifuka, wadanda ke amfani da cunkoson bishiyoyin wajen boye-boye da gudanar da ayyukan da ba su dace ba.
Jami’an tashar sun ce an dauki matakin ne domin kara inganta tsaro a harabar ARTV tare da kare ma’aikata, baki da mazauna yankunan da ke makwabtaka da tashar daga duk wata barazana.
“Wannan mataki na tsaro ne mai muhimmanci, kuma bai kamata a fassara shi a matsayin kokarin lalata muhalli ko gudanar da harkar kasuwancin itatuwa ba,” in ji sanarwar.
ARTV ta kuma musanta zargin cewa an sayar da itatuwan da aka sare domin samun riba, tana mai cewa babu wata hujja da aka gabatar da ke tabbatar da wannan ikirari.
Mahukuntan tashar sun sake jaddada kudurinsu na kare muhalli da kuma kula da kadarorin jama’a yadda ya kamata, suna mai cewa ARTV na da cikakken fahimtar muhimmancin kiyaye muhalli da samar da yanayi mai kyau ga al’umma.
Yayin da suka bukaci jama’a da su yi watsi da abin da suka kira karkataccen bayani, ARTV ta yi kira ga kafafen yada labarai da su rika bin ka’idojin aikin jarida ta hanyar tantance bayanai da neman martanin dukkan bangarorin da abin ya shafa kafin wallafa rahotanni.
Wannan cece-kuce ta biyo bayan wani rahoto da aka wallafa a yanar gizo wanda ya yi zargin cewa an sare manyan bishiyoyi da dama a harabar ARTV, zargin da mahukuntan tashar suka ce an yi masa karin gishiri tare da wallafa shi ba tare da cikakken bincike da tantance gaskiya ba.
Ga masu son bada talla ko shawarwari a kira wannan lambar +2348032077835
Domin samun sauran shirye-shirye Alfijir labarai/Alfijir news ku biyo mu ta nan 👇
https://twitter.com/Musabestseller?s=09
https://www.facebook.com/profile.php?id=100089640289165
https://www.threads.net/@alfijirlabarai
https://www.youtube.com/@BestsellerChannel12
https://www.instagram.com/musa_bestseller?utm_source=qr&r=nametag
Alfijir labarai Alfijir News Whatsapp Group 👇👇
https://chat.whatsapp.com/H5oBRaZBdCVIyOTIV5eMfb?mode=ac_t