Alfijr ta rawaito Rundunar ‘yan sandan jihar Kano ta ce ta kama wasu mutane 93 da ake zargi da laifin damfarar jama’a a lokacin yakin neman zabe a jihar.
Kwamishinan ‘yan sandan jihar, Mamman Dauda ne ya bayyana hakan a wata sanarwa da kakakin rundunar, SP Abdullahi Haruna-Kiyawa, ya fitar ranar Juma’a a Kano.
Sanarwar ta ruwaito Kwamishinan na cewa matakin ya yi dai-dai da umarnin babban sufeton ‘yan sandan Najeriya Usman Alkali-Baba da ke da nufin tabbatar da gudanar da zabe cikin lumana a kasar.
Ya ce jami’an rundunar sun kama mutane 53 da ake zargi a ranar 9 ga watan Fabrairu, a wani samame da suka gudanar a yayin gudanar da harkokin siyasa a filin wasa na Sani Abacha, Kano.
Rundunar ‘yan sandan ta ce ta samu nasarar kwato bindigu guda biyu da aka kera a cikin gida, wukake 32, gatari daya, da kuma tarin laya, a yayin farmakin.
Kwamishinan ya kara da cewa rundunar ta kuma kama wasu mutane 40 da ake zargi da aikata laifin fashi a cikin mako guda da ya gabata a fadin jihar.
Dauda ya ce: “Wani aikin share fage da rundunar ‘Operation Restore Peace’ karkashin jagorancin CSP Bashir Gwadabe, jami’in ‘yan sanda na Anti-Daba suka gudanar ya kai ga kama wadanda ake zargin.
“Kayan da aka kwato sun hada da fakiti 62 na Cannabis, kwalabe 60 na Codiene syrup, wukake 28, babura hudu da injin dinki guda uku”.
Ya kara da cewa nan ba da jimawa ba za a gurfanar da wadanda ake zargin a gaban kotu.
CP ya ce kafin gudanar da ayyukan share fage, kwamitin tuntuba tsakanin hukumomin da ke kula da harkokin zabe (ICCES) ya gana tare da tantance matakin shirye-shiryen da ake yi gabanin babban zaben da ke tafe.
Ya ce an samar da ingantattun na’urorin tsaro domin tabbatar da gaskiya da kuma samun nasara a babban zaben jihar.
Yayin da yake yabawa hukumomin tsaro da kafafen yada labarai da al’ummar jihar bisa goyon bayan da suka bayar, Dauda ya jaddada kudirin rundunar na kare rayuka da dukiyoyi.
Domin Samun sauran shirye shiryenmu, Zaku iya bibiyarmu a
Facebook. Alfijr Labarai
YouTube. Best Seller Channel
Twitter. @Musabestseller
Instagram. @musa_bestseller
Ko a latsa nan don shiga Group Whatsapp na Alfijr Labarai 👇