Alfijr ta rawaito Mutane 14 da shanu 22 sun mutu a wani hatsarin da ya faru a hanyar Jega/Koko a jihar Kebbi.
Hatsarin dai ya faru ne lokacin da wata babbar mota da ke jigilar fasinjoji da shanu daga karamar hukumar Illela ta jihar Sokoto kan hanyarta ta zuwa jihar Legas ta afkawa wata motar da ke gefen hanya (kafada) a kauyen Dada da ke karamar hukumar Koko/Besse a jihar.
Jami’in hulda da jama’a na rundunar ‘yan sandan jihar Kebbi, SP Nafiu Abubakar, ya tabbatar da faruwar hakan a wata sanarwa da ya rabawa manema labarai a Birnin Kebbi.
Sanarwar ta ce; “A ranar 12 ga watan Disamba, da misalin karfe 0530, an samu mummunan hatsarin mota a hanyar Jega/Koko.
Hadarin ya afku ne a lokacin da wata babbar mota dauke da lamba SRZ 518 XS, jihar Sokoto, wani mutum da har yanzu ba a tantance ko wanene ba, dauke da fasinjoji da shanu daga karamar hukumar Illela ta jihar Sokoto, suka nufi jihar Legas, ya bugi wata motar da ke tsaye a gefen titin a Kauyen Dada, Koko/Besse LGA, Jihar Kebbi.
Sakamakon haka, fasinjoji 40 sun samu raunuka daban-daban.
“Da samun rahoton, kwamishinan ‘yan sandan jihar Kebbi, CP Ahmed Magaji Kontagora ya garzaya wurin da lamarin ya faru, inda aka kwashe wadanda lamarin ya rutsa da su zuwa babban asibitin garin Koko domin yi musu magani, inda wani likita ya tabbatar da mutuwar mutane goma sha hudu (14). yayin da sauran wadanda abin ya shafa ke karbar magani a halin yanzu.
Hakazalika, shanu ashirin da biyu (22) suma sun mutu sakamakon hatsarin.
“CP Ahmed Magaji Kontagora ya kuma yi addu’ar Allah ya jikan wadanda suka rasu ya kuma baiwa iyalansu hakurin jure rashin da ba za a iya kwatantawa ba,” in ji shi.
Ya kuma jajantawa iyalan wadanda abin ya shafa, yana mai addu’ar Allah ya basu ikon jure wannan rashi mara misaltuwa.
Kwamishinan ‘yan sandan ya yi kira ga kungiyar ma’aikatan sufuri ta kasa (NURTW) da sauran masu amfani da hanyar da su tabbatar da cewa sun yi amfani da isassun matakan tsaro a cikin motocinsu, su kiyaye iyakacin gudu, su guji sakaci, su yi tuki a hankali da sanin yakamata yayin tuki musamman a lokacin bukukuwa.
Yayi addu’ar Allah ya kare sake faruwa a nan gaba
Domin Samun sauran shirye shiryenmu, Zaku iya bibiyarmu a
Facebook. Best seller Channel
YouTube. Best Seller Channel
Twitter. @Musabestseller
Instagram. @musa_bestseller
Ko a latsa nan don shiga Group Whatsapp na Alfijr Labarai 👇