Sarki Aminu Ado Ya Magantu Akan Takaddamar Sarautar Jihar

X Facebook Telegram WhatsApp

Sarki Aminu Ado Bayero ya yi kira ga jama’ar Kano da su kwantar da hankalin su kuma su zauna lafiya a yayin da ake ci gaba da takaddama kan sarautar jihar.

Alfijir labarai ta rawaito Aminu Bayero ya yi wannan kira ne yayin ganawa da shugabannin tsaro a Fadar Sarkin Kano da ke Nassarawa.

Sarkin ya yaba wa shugabannin tsaro dangane da ziyarar da suka kai masa, ya kuma tabbatar da cewa nan gaba kadan gaskiya za ta yi halinta.

Ya yi addu’ar dorewar zaman lafiya a Jihar Kano da Najeriya baki daya, yana mai kira ga Kanawa da su zama jakadu na zaman lafiya yayin da ake dakon sakamakon shari’ar tube rawaninsa da Gwamnatin Kano ta yi.

Ya kara da cewa, suna da yakinin wadanda ragamar shari’ar da za a soma sauraro kan takaddamar sarautar Kano ke hannunsu za su yi adalci.